പണ്ടത്തെപ്പാട്ട്

പണ്ടത്തെപ്പാട്ട്
കാണാത്ത കാഴ്ച്ചേമില്ല കേക്കാത്ത കാര്യോമില്ല
തിന്നാത്ത തീറ്റേമില്ല കുത്താത്ത മുള്ളുമില്ല
ഉണ്ടാലുമുണ്ടില്ലേലും ചത്തില്ലേലത്രേം കാലം
എല്ലാമെന്നുള്ളിൽ കേറും പാട്ടായിത്തീരേം ചെയ്യും
വേണ്ടാത്തതെല്ലാം തന്നാൽ വേണ്ടുന്നതെന്തും പാടാം
ചോദിച്ചാലെന്തും ചൊല്ലാം പാടേണമെന്നോടൊപ്പം
നിന്റേതാണെന്റേതെല്ലാം നീയുമങ്ങെന്റേതായാൽ
ഒന്നായിട്ടൊന്നിച്ചൊപ്പം നന്നായിട്ടെല്ലാം ചെയ്യാം
പണ്ടത്തെപ്പാട്ടും പാടി പാടത്തെ വെള്ളോം തേകി
വേലയ്ക്കു പോകമൊന്നായ് കൂലിയും വാങ്ങാമൊന്നായ്
കാന്താരീം മോരും ചേർത്ത് തോട്ടിലെ മീനും കൂട്ടി
കാലത്തീ പഴഞ്ചോറ് ഉച്ചയ്‌ക്കോ കപ്പേം ചക്കേം
വേലയും കാണാമൊന്നായ് കൂത്തിനും കൂടാമൊപ്പം
തേവരെ കാണാൻ പോയാൽ കൂട്ടരേം കാണാമല്ലോ
പോരുമ്പോഴങ്ങാടീന്ന് മേടിക്കാം തിന്നാന്തീറ്റി
വൈകാതെ വീട്ടിൽ ചെല്ലാം വൈകേണ്ടിന്നത്താഴവും
പാഠങ്ങൾ ചൊല്ലിച്ചൊല്ലി കുട്ടികൾ തൂക്കം തൂങ്ങി
അത്താഴമുണ്ണാമിപ്പോഴെല്ലാർക്കുമൊപ്പം കൂടാം
അപ്രത്തെയമ്മൂമ്മയ്ക്കും പൂച്ചയ്ക്കും തത്തമ്മയ്ക്കും
കൊണ്ടുപൊയ്ക്കൊടുക്കേണം എന്നിട്ടേ ഉണ്ണാവുള്ളൂ
കെ ശ്രീകുമാർ