ചായം പൂശിയ വീട്

സ്നേഹിതരേ,

ഞങ്ങളുടെ രണ്ടാമത്തെ സംരംഭമായ ചായം പൂശിയ വീട് എന്ന ചിത്രത്തിന്റെ നിർമ്മാണപ്രവർത്തനങ്ങൾ തുടങ്ങിക്കഴിഞ്ഞു. .അറുപതുവയസ്സുള്ള ഗൗതം എഴുത്തുകാരനാണ്‌ . കടലിനടുത്ത് ഒരു വീട്ടിൽ ഒറ്റയ്ക്കാണ് താമസം. കാക്കകൾക്ക് തീറ്റ കൊടുത്തു കൊണ്ടുള്ള ഒരു നടത്തത്തോടെയാണ് അദ്ദേഹത്തിന്റെ ഒരു ദിവസം ആരംഭിക്കുന്നത് . വെട്ടിയൊരുക്കിയ സമൃദ്ധമായ താടിയും ശബ്ദസൌകുമാര്യമൊക്കെയുള്ളഅദ്ദേഹം 'നല്ലൊരു മനുഷ്യനാണ്'. സ്വത്വത്തിന്റെ നിശ്ശബ്ദതയിൽ നാം തിരിച്ചറിയുന്ന ശാന്തിയും കരുണയുമാണ്‍ ഒരു യഥാർത്ഥ ജീവിതത്തിന്റെ ലക്ഷണങ്ങൾ, അദ്ദേഹം എഴുതുന്നു.

ഒരു പ്രഭാതത്തിൽ ബീച്ചിൽ വെച്ച് ഗൗതം സുന്ദരിയായ വിഷയയെ കാണുന്നു. അടുത്ത ദിവസം ചെറിയ ഒരു സഹായം ചോദിച്ച് രാഹുൽ എന്നൊരു ചെറുപ്പക്കാരൻ അദ്ദേഹത്തെ സമീപിക്കുന്നു. നിസ്സാരമായ ഈ രണ്ടു കണ്ടുമുട്ടലുകളും ഗൗതമിന്റെ ജീവിത്തിലെ ഏറ്റവും സാരമായ ഒരു ഉടച്ചുവാർക്കലിന് കാരണമാകുന്നു.

നാടകരംഗത്ത് വർഷങ്ങളുടെ പരിചയവും അന്താരാഷ്ട്ര പ്രശസ്തിയുമുള്ള ശ്രീ കലാധരനാണ് നായകൻ. ഇംഗ്ലീഷിലും വിവിധ ഇന്ത്യൻ ഭാഷകളിലും കഴിവുതെളിയിച്ച നേഹാ മഹാജൻ ആണ് നായിക. അറിയപ്പെടുന്ന പ്രൊഫഷണൽ ഡാൻസറായ ശ്രീ അക്രം മുഹമ്മദും ഒപ്പമുണ്ട്

ചിത്രത്തിന്റെ ഇംഗ്ലീഷിലുള്ള തിരക്കഥ വായിച്ച നേഹ തന്റെ എല്ലാ തിരക്കുകളും മാറ്റി വെച്ച് ഈ ചിത്രത്തിൽ അഭിനയിക്കാൻ താത്പര്യം കാട്ടുകയായിരുന്നു. ഇന്ത്യയിലെ വിദേശത്തെയും ഒട്ടനവധി മികച്ച സംവിധായകരോടൊപ്പം പ്രവർത്തിച്ചിട്ടുള്ള നേഹ അവിശ്വസനീയമമായ കരവിരുത് എന്നാണ് തിരക്കഥയെക്കുറിച്ചു പറഞ്ഞത് .

സന്തോഷ്‌ ബാബുസേനനും  സതീഷ്‌ ബാബുസേനനും ചേർന്ന് രചനയും സംവിധാനവും നിർവഹിക്കുന്ന ഈ ഫിഫ്ത് എലമെന്റ് ചിത്രത്തിന്റെ സംഗീതം കെ സന്തോഷ് ആണ് 

കെ ശ്രീകുമാർ

മലയാളത്തിൽ ഒരു സിനിമാക്കഥ

 

കാര്‍വാര്‍ 9 നവംബർ  2014 : തിരുവനന്തപുരത്ത് ശ്രീ പദ്മനാഭക്ഷേത്രത്തില്‍ നടന്ന ഒരു വെടിവെയ്പുമായി ബന്ധപ്പെട്ടു കേരളത്തില്‍ നിന്നുള്ള ഒരു സാമൂഹ്യ പ്രവര്‍ത്തകനെ ഇന്നലെ നഗരത്തില്‍ അറ്റസ്റ്റ് ചെയ്യുകയുണ്ടായി. ഇതേക്കുറിച്ചുള്ള അന്വേഷണത്തില്‍ നിന്നും പുറത്ത് വരുന്ന വിവരങ്ങള്‍ ലോകത്ത് ഇന്ന് വരെയുള്ളതില്‍ ഏറ്റവും വലിയ ഗൂഡാലോചനയിലേയ്ക്ക് ആണ് വിരല്‍ ചൂണ്ടുന്നത്. ഒരു പക്ഷെ ഇത്ര സസൂക്ഷ്മമായ പ്ലാനിങ്ങും ഇത്രയധികം സമയമെടുത്ത ഒരുക്കങ്ങളും ഇന്ന് വരെ മറ്റൊരു കവര്‍ച്ചയില്‍ കാണാന്‍ കഴിഞ്ഞെന്നു വരില്ല. 
വിവിധ സ്ത്രോതസ്സുകളില്‍ നിഇന്നും കിട്ടിയ വിവരങ്ങള്‍ കൂട്ടി വായിക്കുമ്പോള്‍ കിട്ടുന്ന വിവിഅരങ്ങള്‍ ഏകദേശം ഇങ്ങിനെയാണ്‌. ജാഫ്നയുടെ പതനത്തിനു മുന്‍പ് തന്നെ തിരുവനന്തപുരത്തെ ഒരു ക്ഷേത്രത്തില്‍ ഒളിഞ്ഞു കിടക്കുന്ന അലവട്ട്ഗ സ്വത്തിനെക്കുറിച്ച് തമിഴ് പുലികള്‍ക്ക് വിവരം ലഭിച്ചിരുന്നു. അതെക്കുറിച്ചു കൂടുതലറിയുന്നതിനായി അവര്‍ ഒരു സംഘത്തെ അയച്ചിരുന്നു. അത് തട്ടി എടുക്കാന്‍ അവര്‍ ഒരു പദ്ധതിയും ആവിഷ്കരിച്ചിരുന്നു. ഇതെക്കുറിച്ചുള്ള ചര്‍ച്ചകള്‍ കൂടുതലും നോര്‍വെയില്‍ താമസമാക്കിയ ഒരു രാജകുടുംബാംഗത്തിന്റെ വീട്ടിലാണ് നടന്നത്. ഇദ്ദേഹം തിരുവിതാംകൂര്‍ കൊട്ടാരവുമായി അകന്ന ബന്ധമുള്ളയാളാണ്. 
ഈ പദ്ധതി വളരെ സന്കീര്‍ണമായതും നടപ്പില്‍ വരുത്താന്‍ വര്‍ഷങ്ങളുടെ കാലതാമസം എടുക്കുന്നതുമായിരുന്നു. ഒരു പാളിച്ചയും ഉണ്ടാകാത്ത രീതിയിലാണ് ഇതു രൂപപ്പെടുത്തിയിരുന്നത്‌ . പദ്മതീര്‍ഥക്കുളത്തില്‍ നിന്നും നിലവറയ്ക്കകത്തേയ്ക്ക് ഒരു രഹസ്യതുരങ്കം ഉള്ളതായി ഇദ്ദേഹത്തിനറിയാമായിരുന്നു. അത് കൊണ്ട് മുങ്ങല്‍ വിദഗ്ധന്‍മാരെ ഉപയോഗിച്ചു കുളത്തിലൂടെ എത്തി ആ ഭാഗത്ത് നിന്ന് നിലവറ തുറക്കാനായിരുന്നു ഉദ്ദേശം. 
12 വര്‍ഷം മുന്‍പ് ഇതുമായി ബന്ധമുള്ള മൂന്നു പേര്‍ ഈ കുളത്തില്‍ മുങ്ങി മരിച്ചിട്ടുണ്ട്. ഇതില്‍ ഒന്ന് ഒരു വിദേശ വനിതയും മറ്റു രണ്ടു പേര്‍ ഒറിസാക്കാരുമാണ്. മുങ്ങി മരിച്ച വനിതയുടെ ബന്ധുക്കള്‍ക്ക് ആ കാലത്ത് തന്നെ അവരുടെ മരണത്തില്‍ സംശയം ഉണ്ടായിരുന്നു. ഒളിമ്പിക്സില്‍ നീന്തല്‍ മത്സരത്തിലും ഡൈവിംഗ് മത്സരത്തിലും പങ്കെടുത്ത അവര്‍ ചാവുകടലിലെ ഗര്‍ത്തങ്ങള്‍ ഡിസ്കവറി ചാനലിനായി ചിത്രീകരിച്ചിട്ടുണ്ട്. പേരറിയാത്ത ഒരു വ്യക്തിയുടെ സ്പോന്‍സര്‍ഷിപ്‌പോടെ ഒറീസ യില്‍ നിന്നിള്ളവര്‍ നോര്‍വെ സന്ദര്‍ശിച്ചിട്ടുമുണ്ട്. ഏതാനും വര്‍ഷങ്ങള്‍ക്കു മുന്‍പ് ചിത്തഭ്രമമുള്ള ഒരു യുവാവ് ഈ കുളത്തില്‍ ആത്മഹത്യയ്ക്ക് ശ്രമിക്കുകയും അയാളെ അതില്‍ നിന്ന് പിന്തിരിപ്പിക്കാന്‍ ശ്രമിച്ച പോലീസുകാരനെ ബലം പ്രയോഗിച്ചു കുളത്തില്‍ മുക്കി കൊല്ലുകയും ചെയ്തിരുന്നു. ഈ വാര്‍ത്ത‍ ലൈവ് ആയി സംപ്രേക്ഷണം ചെയ്ത ചാനലുകള്‍ അന്ന് ഏറെ വിമര്‍ശനങ്ങള്‍ ഏറ്റുവാങ്ങിയിരുന്നു. ഈ യുവാവ് ഭ്രാന്ത് അഭിനയിക്കുകയാണെന്നു അന്ന് തന്നെ അഭ്യൂഹമുണ്ടായിരുന്നു. ഈ യുവാവിനെയും ചോദ്യം ചെയ്തു വരുന്നു. 
ജാഫ്നയുടെ പതനത്തിനുശേഷം ഈ പദ്ധതി തുടരാനായിരുന്നു ഈ സംഘത്തിന്റെ തീരുമാനം. പക്ഷെ അതിനായി ഫണ്ട്‌ കണ്ടെത്തുക പ്രയാസമായിരുന്നു. പ്രാഥമിക ജോലികളെല്ലാം ചെയ്തു ഇതിനകം ചെയ്തു കഴിഞ്ഞിരുന്നു. പോലീസിലും ക്ഷേത്ര ഭരണ സമിതിയിലും ദേവസ്വം ബോര്‍ഡിലും ഇവരുടെ ആളുകള്‍ സ്ഥാനങ്ങള്‍ കൈയ്യേറിക്കഴിഞ്ഞിരുന്നു. നോര്‍വേയില്‍ ജീവിക്കുന്ന അവരുടെ ചീഫില്‍ നിന്നും സിഗ്നല്‍ പ്രതീക്ഷിച്ചിരിക്കുകയായിരുന്നു അവര്‍ . അവര്‍ക്ക്വേണ്ട നിര്‍ദേശങ്ങള്‍ നല്കിയിരുന്നവരില്‍ കോളേജ് പ്രൊഫസര്‍മാരും മ്യൂസിയം ക്യൂറെറ്റര്‍മാറും ഉള്‍പ്പെടുന്നു. ഒരിക്കല്‍ പോലും ഒരു സന്ദേശം പോലും ഇവര്‍ ഫോണ വഴി കൈ മാറിയിരുന്നില്ല. സന്ദേശവാഹകര്‍ വഴി മാത്രമായിരുന്നു ആശയവിനിമയം. ഈ പദ്ധതി നടപ്പില്‍ വരുത്താന്‍ ഇത്രയും കാലതാമസം വന്നത് ഇത് കൊണ്ടാണെങ്കിലും രഹസ്യങ്ങള്‍ ഒരു കാരണവശാലും പുറത്ത് അറിയാതിരുന്നതും ഇത് കൊണ്ടാണ്. ഈ വലിയ സ്വര്‍ണ ശേഖരത്തെക്കുറിച്ച് ആര്‍കും അറിയാതിരുന്നത്‌ കൊണ്ട് കാലതാമസം അവര്‍ക്ക് ഒരു പ്രശ്നമല്ലായിരുന്നു. ഇതിനു വേണ്ടി ചിലവാക്കാന്‍ കുറച്ചു പണം അവര്‍ കണ്ടെത്തിയത് ഒരിക്കല്‍ കൊച്ചി വിമാന താവളത്തില്‍ എത്തുകയുണ്ടായി
പണം വന്ന പെട്ടി ഒരു കാര്‍ ഗോയിലും രേഖപ്പെടുത്തിയിരുന്നില്ല. അതില്‍ ചിലര്‍ക്ക് സംശയം തോന്നിയപ്പോഴേക്കും പെട്ടി അപ്രത്യക്ഷമായിക്കഴിഞ്ഞിരുന്നു
ഇതിന്റെ പേരില്‍ ചില കസ്റ്റംസ് ഉദ്യോഗസ്ഥരെ സസ്പെന്റ് ചെയ്യുകയുണ്ടായി. അവരില്‍ ചിലര്‍ ഇപ്പോഴും നിയമ നടപടികള്‍ നേരിടുകയാണ് പക്ഷെ യൂറോപ്പിലും മറ്റും ഉണ്ടായ സാമ്പത്തിക മാന്ദ്യത്തെത്തുടര്‍ന്ന് ഈ നോര്‍വീജിയാക്കാരന് തന്റെ സമ്പാദ്യമെല്ലാം നഷ്ടപ്പെടുകയും ഈ ഗൂഡസംഘത്തിന്റെ നേതൃസ്ഥാനം ഒഴിയുകയും ചെയ്യേണ്ടി വന്നു. തമിഴ് പുലികളോട് അനുഭാവമുള്ള ഒരു ദക്ഷിണേന്ത്യന്‍ രാഷ്ട്രീയക്കാരനാണ് പിന്നീട് ഇതിന്റെ നേതൃത്വം ഏറ്റെടുത്തത്. അങ്ങനെ ഒടുവില്‍ രാജീവ് ഗാന്ധിയുടെ ഘാതകിയായ തനുവിന്‍റെ ചിറ്റപ്പന്‍ രഘുരാമന്റെ കീഴില്‍ തമിഴ് പുലികളുടെ സൈന്യം പുനരുജ്ജീവിപ്പിക്കുന്നതിനായി ഈ ക്ഷേത്രത്തിലെ അളവറ്റ ധനം ഉപയോഗിക്കുവാന്‍ തീരുമാനിച്ചു. കൊലപാതകത്തിന് ഇപ്പോള്‍ ജയില്‍ ശിക്ഷ അനുഭവിക്കുന്ന ഒരു ഇടത്തരം രാഷ്ട്രീയക്കാരനെ ഈ സംഘം ഇതിനായി സമീപിക്കുകയുണ്ടായി. ഒരു സുപ്രീം കോടതി ജഡ്ജിയെ സ്വാധീനിച്ച് വെറുതെ വിട്ടു കൊണ്ടുള്ള ഒരു വിധി സമ്പാദിക്കാന്‍ ആവശ്യമായ പണം ഇയാള്‍ക്ക് നല്‍കുകയും ചെയ്തു. തന്റെ മറ്റൊരു ബന്ധുവിനെ ചില വസ്തു ഇടപാടുകളില്‍ വഴി വിട്ടു സഹായിച്ചതിന്റെ പേരില്‍ ഈ ജഡ്ജി ഇപ്പോള്‍ നിയമ നടപടികള്‍ നേരിടുകയാണ്. ഈ രാഷ്ട്രീയക്കാരന്‍ ജയില്‍ മോചിതനായ ശേഷം രാഷ്ട്രീയം വിടുകയും ഒരു സാമൂഹ്യ പ്രവര്‍ ത്തകനാകുകയും ചെയ്തു. ഇദ്ദേഹവും ഈ അമ്പലത്തിലെ ധനം നിശ്ചയിക്കണം എന്നാവശ്യപെട്ട് ഒരു ആര്‍ ടി ഐ കേസ് ഫയല്‍ ചെയ്തിരുന്നു. ഈ കൊള്ള നടത്തുവാനായി അമ്പതിനായിരം കോടി രൂപ ചിലവാക്കുവാന്‍ തയ്യാറായവര്‍ക്ക് അവരുടെ കാശിന്റെ രണ്ടിരട്ടിയെങ്കിലും ഈ കൊള്ളയില്‍കൂടി തിരികെ ലഭിക്കും എന്ന വിശ്വാസം ഉണ്ടാക്കുവാന്‍ ഇത് അത്യാവശ്യമായിരുന്നു. നഗരത്തിലെ രണ്ടു വിഭിന്ന മതവിഭാഗങ്ങള്‍ തമ്മില്‍ ഒരു കലഹം ഉണ്ടാക്കുവാനും അത് നിയന്ത്രിക്കാനെന്ന വണ്ണം ഇന്ത്യന്‍ പട്ടാളക്കാരുടെ വേഷം ഇടുവിച്ചു തമിഴ് പുലികളെ നഗരത്തില്‍ ഇറക്കുവാനുമായി പുതിയ ഗവണ്‍മെന്റിന്റെ വരവും കാത്തിരിക്കുകയായിരുന്നു ഈ ഗൂഡസംഘം. മുന്‍പൊരിക്കല്‍ ചാലക്കമ്പോളം അക്രമത്തെത്തുടര്‍ന്നു തീ പിടിച്ചപ്പോള്‍ പട്ടാളം ഇറങ്ങിയതിന്റെ വിഷാദ വിവരങ്ങള്‍ ഇവര്‍ ഇതിനായി ശേഖരിച്ചിരുന്നു. കാര്യങ്ങള്‍ കൂടുതല്‍ കൂടുതല്‍ വഷളാകുമ്പോള്‍ വന്‍ യുദ്ധസന്നാഹങ്ങളോടെ പട്ടാളക്കാരെയും ആയുധങ്ങളും ടാങ്കുകളും മറ്റും ഇറക്കി അതിന്റെ മറവില്‍ സ്ഫോടനങ്ങള്‍ നടത്തി ക്ഷേത്രം കൊള്ള ചെയ്യാമെന്നായിരുന്നു ഇവരുടെ കണക്കു കൂട്ടല്‍ . വളരെ സങ്കീര്‍ണമായ ഒരു പദ്ധതി സൂക്ഷ്മമായി പ്ലാന്‍ ചെയ്തു നടപ്പിലാക്കാനായി എല്‍ ടി ടി ഇ യുടെ പരിശീലനം നേടിയ നൂറു കണക്കിന് ഭടന്മാരാണ് കൊല്ലങ്ങള്‍ക്ക് മുന്‍പ് തന്നെ നഗരത്തില്‍ സ്ഥിരതാമസക്കാരവുകയും പോലീസിന്റെ വിവിധ തസ്തികകളില്‍ നുഴഞ്ഞു കയറുകയും ചെയ്തിരുന്നത്. ഇതിനെല്ലാം കൂടി ഇരുപതിലധികം ഇരുപതിലധികം വര്‍ഷം എടുത്തതായി കണക്കാക്കപ്പെടുന്നു. കോടിക്കണക്കിനു രൂപയുടെ ചിലവും. വെറും സ്കൂള്‍ വിദ്യാഭ്യാസം മാത്രമുള്ള, ഇലക്ട്രോണിക്സില്‍ അതീവതാത്പര്യമുള്ള ഒരു പോലിസ്കോണ്‍സ്റ്റബിളിന്റെ സന്ദര്‍ഭോചിതമായ ഇടപെടീല്‍ മൂലം ദീര്‍ഘദൂരപ്രസരണ ശേഷിയുള്ള ഒരു ട്രാന്‍സ്മിറ്റര്‍ അമ്പലത്തിനുള്ളിലെ ഒരു ടെലഫോണിലും അതിനു സമാനമായ ഉപകരണങ്ങള്‍ നഗരത്തിലെ മറ്റു ടെലഫോണുകളിലും കണ്ടെത്തുകയുണ്ടായി. നിര്‍ഭാഗ്യവശാല്‍ കൊള്ളകാര്‍ ക്കാണ് ഇതേ ക്കുറിച്ചു ആദ്യം വിവരം കിട്ടിയത്. സമയം പാഴാക്കാതെ അവര്‍ തങ്ങളുടെ രണ്ടാമത്തെ പ്ലാന്‍ നടപാകാന്‍ തിടുക്കത്തില്‍ ആരംഭിച്ചു. അവരില്‍ ഒരാള്‍ നേരത്തെ തന്നെ അമ്പലത്തിലെ ഒരു ഗാര്‍ഡായി പറ്റിക്കൂടിയിരുന്നു. നാഷണല്‍ ജോഗ്രഫിക്കിന്റെ ആള്‍ ക്കാരാ ണെ ന്ന ഭാവത്തില്‍ ഒരു സംഘം ആള്‍ക്കാര്‍ക്ക് ഇയാള്‍ അമ്പലത്തിനകത്തെ നിരോധിത മേഘലയില്‍ പ്രവേശികാന്‍ അനുവാദം നല്‍കി. കൂടെയുണ്ടായിരുന്ന രണ്ടു ഗാര്‍ഡുകളെ ഇയാള്‍ വെടിവെച്ചു കൊല്ലുകയും ചെയ്തു. ഈ സംഘം നിലവറയിലെ വാതിലിലും മറ്റും ടൈം ബോംബുകള്‍ ഘടിപ്പിച്ച ശേഷം പുറത്ത് വന്നു. ഇത് തക്ക സമയത്ത് തന്നെ കണ്ടെത്തുകയും റോബോട്ടുകളുടെ സഹായത്താല്‍ നീര്‍വീര്യമാക്കുകയും ചെയ്തു. 
മുഹമ്മദ്‌ കുട്ടി എന്നാണു ഈ കഥയിലെ നായകന്‍റെ പേര് . ഇദ്ദേഹത്തിന്റെ കാമുകിയായ പ്രശസ്ത മോഡല്‍ ത്രിഷയെ ഇതിനിടയില്‍ അക്രമികള്‍ തട്ടിക്കൊണ്ടു പോവുകയുണ്ടായി. ഇവരെ സാഹസികമായി കമാണ്ടോകള്‍ മോചിപ്പിച്ചു. 

ഒരു ഓണപ്പാട്ട്

പൂവിറുക്കാൻ വാ, ഊയലാടാൻ വാ 

പൂക്കളത്തിൽ പൂനിറയ്ക്കാൻ 

തുമ്പി തുള്ളാൻ വാ    

                                (പൂവിറുക്കാൻ വാ)

മോടിയേറും കോടിയുടുക്കാൻ 

തൂശനിലകളിൽ സദ്യവിളമ്പാൻ

ചിങ്ങമാസം വന്നു ചേരുവാൻ

കാത്തിരുന്നു നാം ഓർത്തിരുന്നു നാം  

                                 (പൂവിറുക്കാൻ വാ)

സ്നേഹമാണു നീ സ്വപ്നമാണു നീ 

തുമ്പിയായ്പറന്നു വന്ന പൂനിലാവ് നീ 

ഓണനാളു നീ വരുമ്പൊഴുള്ളു കുളിർക്കും  

കാണുവാൻ കൊതിച്ച നാടുമൊന്നു തളിർക്കും 

                                 (പൂവിറുക്കാൻ വാ)

ഒത്തു ചേരണം ഒന്നുചേരണം 

പോയനാളുകൾ ഓർത്തുപാടണം 

നല്ല നാളെകൾ കനവു കാണണം 

താളമോടെ നാം ചുവടു വെയ്ക്കണം 

                                  (പൂവിറുക്കാൻ വാ)

ജന്മനാ രോഗി

പ്രതീക്ഷയ്ക്ക് വകയുണ്ടെന്നു ഡോക്ടര്‍ പറഞ്ഞു 

ഒരു വകയും പ്രതീക്ഷിക്കേണ്ടെന്നു ഞാനും 

സൗജന്യമായി മന്ത്രവാദം മാത്രെമേ ഉള്ളൂ 

മരുന്നില്ലെന്നു  ഡോക്ടര്‍, കനിവില്ലെന്നു നേഴ്സ് 

മരണത്തിനൊക്കെ ഒത്തിരി  വിലയാവുമോ എന്ന് ഞാനും  

വെളുത്ത രക്താണുക്കള്‍ കുറവാണത്രേ 

അവ ലോകത്തിലില്ലെന്ന് തന്നെയാണ് എന്റെ വിശ്വാസം 

ചോര  ചുവപ്പല്ലേ അപ്പോള്‍ ചുവന്നവ അല്ലെ കാണൂ 

ഒരു പക്ഷെ പാലില്‍ എങ്ങാനും 

എങ്കില്‍ അമ്മയോട് ചോദിക്കണം 

എല്ലാം പടി പടി ആയിട്ടാണെന്ന് തോന്നുന്നു 

അതല്ലേ ഡോക്ടരും പടി ചോദിക്കുനത് 

എങ്ങോട്ട് തിരിഞ്ഞാലും പടികള്‍ 

വശത്തേയ്ക്കും മുകളിലേയ്ക്കും താഴേയ്ക്കും 

കറങ്ങിത്തിരിഞ്ഞു തുടങ്ങിയിടത്തു തന്നെ എത്തുമായിരിക്കും 

ചെരുപ്പ്‌ അവിടെയാണ് ഊരിയിട്ടത്  

പുക്കിള്‍കൊടി അവിടെയാണ് മുറിച്ചിട്ടത് 

നഗ്നത അവിടെയാണ് ഉരിഞ്ഞിട്ടത് 

ആരൊക്കെയാണ് കൂട്ടിനു വന്നത് 

അവരിപ്പോള്‍ എന്നെ തിരയുന്നുണ്ടാവും 

രോഗികളെന്നു കരുതി ശാസ്തക്രിയയ്ക്ക് 

വിധേയരായിട്ടുന്ദാവും, മരിച്ച്ചിട്ട്ടുണ്ടാവും 

എല്ലാം കഴിഞ്ഞെന്നോര്‍ത്തു ജീവിക്കാന്‍ തുടങ്ങിയിട്ടുണ്ടാവും 

ജീവിക്കാനായി ചാകേണ്ടി വന്നവര്‍ 

ഇതാ എന്റെ ചെരുപ്പ് ഇവിടെ കിടക്കുന്നു 

വാർത്താവലോകനം

ശവത്തിനു കാവലിരുന്ന്

തലക്കെട്ടുകള്‍ തമ്മില്‍ത്തല്ലി

പാതവക്കില്‍ തളം കെട്ടിയ രക്തം

പത്രത്തില്‍ കറുത്ത ലിപികളായി

വേണ്ടതോക്കെ ചെയ്തവര്‍ തന്നെ

വേണ്ടതൊക്കെ ചെയ്യാമെന്ന്

വേണ്ടപ്പെട്ടവര്‍ക്ക് വാക്ക് കൊടുത്തു

വേണ്ടാത്തതിനൊന്നും പോകരുത്

എന്നൊരു താക്കീതും

തെരുവിലെ യുദ്ധത്തില്‍ പങ്കില്ലെന്ന്

അവര്‍ അവളില്‍ നിന്ന് എഴുതി വാങ്ങിയിരുന്നു

(വായ അവര്‍ മൂടിക്കെട്ടിയിരുന്നു )

പതിഞ്ഞ ശബ്ദത്തില്‍

ഹൃദയം പ്രാണവായുവിനോട്

പിരിയരുതെന്നു കെഞ്ചി,

കണ്ണ് കാഴ്ചയോടും.

ജലപീരങ്കിയിലെ കുടിവെള്ളത്തിനു ഉപ്പുരസം

കണ്ണീരിന്റെയാകണം,

എന്റെ.

ദൃശ്യം

An Inspector Calls

ഓണക്കാലത്ത് മലയാളിക്കുമുൻപിൽ ഒരു ദൃശ്യം കടന്നു വരികയാണ് .

ഈ ദൃശ്യം നമ്മുടെ സമൂഹത്തിനു നേരെ പിടിച്ച കണ്ണാടി ആണെങ്കിലും ഈ കണ്ണാടി ആരാണ് കണ്ടു പിടിച്ചതെന്ന തർക്കം  മാറിയിട്ടില്ല. 

ഒരു കൊലപാതകം നടത്തിയിട്ട് എങ്ങനെ രക്ഷപ്പെടാം എന്ന് പഠിപ്പിക്കുന ഈ ചിത്രത്തിന്റെ വിദ്യാഭ്യാസ സാധ്യതകൾ കണക്കിലെടുത്താവണം ഇതിലെ വയലൻസും ദ്വയാർത്ഥ പ്രയോഗങ്ങളും ഒക്കെ മാറ്റി വെച്ച് സർക്കാർ ഇതിനു 'എ' സർട്ടിഫിക്കറ്റ് കൊടുക്കാൻ മടിച്ചത്. അതോ അത് കൊടുത്താൽ കൂടുതൽ ആൾകാർ കാണുമെന്നു ഭയന്നിട്ടാണോ. 

പഞ്ചനക്ഷത്ര തീയേറ്ററുകളിൽ മാത്രമല്ല ദേണ്ടെ ഇപ്പോൾ ചാനലിലും ഓണത്തിന്റെ ഉരുളയ്ക്കുപ്പേരി പോലെ ഈ ചിത്രം വിളമ്പിയിരിക്കുന്നു. 

ഒരു ദിവസം മുഴുവൻ ത്രില്ലടിച്ചിരുന്ന്‌ ഇത് കണ്ടോളൂ 

പക്ഷെ അത് കഴിഞ്ഞു ഒരു മറുമരുന്നു എന്ന നിലയിൽ കാണാൻ ഒരു ഇംഗ്ളീഷ് ചിത്രം ശുപാർശ ചെയ്യുന്നു 

ഇത് ജെ ബി പ്രീസ്റ്റ്ലിയുടെ ഒരു നാടകത്തെ അവലംബിച്ചുള്ള താണ്  

An Inspector Calls

ചിത്രം കാണുകയോ പുസ്തകം വായിക്കുകയോ ആകാം.

അതിനു സമയം കിട്ടാത്ത വർക്കായി അതിന്റെ കഥ ഇവിടെ കൊടുക്കുന്നു 

1912 ൽ ഒന്നാം ലോകമഹായുദ്ധ ത്തിനു മുൻപാണ്‌ ഈ കഥ നടക്കുന്നത്. വ്യവസായ പ്രമുഖനും രാഷ്ട്രീയ ക്കാരനുമായ ആർതർ ബിർലിങ്ങിന്റെ വീട്ടിൽ അത്താഴ വിരുന്നിനോടൊപ്പം ഒരു വിവാഹ നിശ്ചയം നടക്കുകയാണ്. ബിർലിങ്ങിന്റെ മകൾ  ഷീല കല്യാണം കഴിക്കുന്നത്‌ അയാളുടെ ബിസിനസ് എതിരാളിയായ ക്രോഫ്റ്റിന്റെ മകൻ ജറാൾഡിനെയാണ് . ഭാര്യ സിബിൽ മകൻ എറിക് എന്നിവരും അവിടെ ഉണ്ട്.മകന്റെ മദ്യാസക്തി അവരാരും കണ്ടില്ലെന്നു വെയ്ക്കുന്നു. സ്വാശ്രയത്വത്തിന്റെ ആവശ്യകതയെക്കുറിച്ച് ബിർലിങ്ങ് ഒരു പ്രഭാഷണവും കാഴ്ചവെയ്ക്കുന്നു. സ്വന്തം കാര്യം സിന്ദാബാദ് എന്ന് സാരം.

ഗൂൾ എന്ന് പേരായ ഒരു ഇൻസ്പെക്ടർ അവിടെ എത്തുന്നു. ഇവ  എന്ന ഒരു പെണ്‍കുട്ടി ആത്മഹത്യ ചെയ്തതുമായി ബന്ധപ്പെട്ടാണ് താൻ വന്നതെന്ന് അദ്ദേഹം അവരെ അറിയിക്കുന്നു. അവളുടെ ചിത്രം കണ്ടു ബെർലിങ്ങ് അവളെ തിരിച്ചറിയുന്നു. ഒരല്പം കൂലി കൂടുതൽ ചോദിച്ചതിന് തന്റെ ഫാക്റ്ററിയിൽ നിന്ന് പതിനെട്ടു മാസം മുൻപ് അവളെ താൻ പുറത്താക്കി എന്ന്  അയാള് സമ്മതിക്കുന്നെന്ടെങ്കിലും അയാൾ അതിന്റെ ഉത്തരവാദിത്വം ഏറ്റെടുക്കാൻ തയാറാകുന്നില്ല. മുറിയിൽ കടന്നുവരുന്ന ഷീല ഈ ചർച്ചയിൽ ഇടപെടുന്നു. അവള്ക്കും ഈവയെ അറിയാം. ഒരു തുണിക്കടയിൽ വെച്ച് തന്നെ കളിയാക്കി പു ഞ്ചിരിച്ചെന്നു കണ്ട് ആ കടക്കാരെ വിരട്ടി അവളെ അവിടെ നിന്നും താൻ പുറത്താ ക്കിച്ചു എന്നവൾ സമ്മതിക്കുന്നു. സുന്ദരിയായ ഈവയോട് തോന്നിയ അസൂയ യായിരുന്നു അതിന്റെ കാരണം എന്നും അവൾ സമ്മതിക്കുന്നു.

 അടുത്തത് ജറാൾഡിന്റെ ഊഴമായിരുന്നു. ഈവയെ ഒരു ബാറിൽ നിന്നും കൂട്ടിക്കൊണ്ടുപോയി രഹസ്യമായി താൻ ഒരിടത്ത് താമസിപ്പിചിരുന്നെന്നും അതെ കാലത്താണ് ഷീലയെ അധികം കാണാൻ വരാതിരുന്നതെന്നും അയാൾ സമ്മതിക്കുന്നു. അയാളുടെ വൈകിവന്ന സത്യ സന്ധതയെ വാഴ്ത്തുന്ന ഷീല അയാളുമായുള്ള നിശ്ചയം തള്ളിക്കളയുന്നു. 

മിസ്സിസ് ബാർലിങ്ങ് ഒരു സാമൂഹ്യ പരിരക്ഷ കമ്മിറ്റി യുടെ തലവ ആണ്. അവരുടെ അടുത്തു സഹായം അഭ്യർത്ഥി ച്ചു വന്ന ഈവയെ അവർ തള്ളിപ്പറഞ്ഞിരുന്നു. അവർ പറയുന്ന കഥ ഇങ്ങിനെയാണ്‌. ഗർഭിണിയായ ഇവ   മിസ്സിസ് ബാർലിങ്ങ് എന്നാ കള്ളപ്പേരിലാണ് അവരിൽ  നിന്നും സഹായം തേടി എത്തിയത്. തന്റെ പേര് തന്നെ ഉപയോഗിച്ചതായിരുന്നു അവർക്ക് അവളോട് വെറുപ്പ്‌ തോന്നാനും സഹായം നിരസിക്കുവാൻ ആ ഓഫീസിലുള്ളവരെ പ്രേരിപ്പിക്കുവാനും ഉള്ള കാരണം. മറ്റു കള്ളങ്ങളും അവൾ പറഞ്ഞു. അവളെ ഗർഭിണിയാക്കിയ ചെറുപ്പക്കാരൻ അവൾക്കു കാശ് കൊടുത്തെങ്കിലും അത് മോഷ്ടി ച്ച കാശാ യതു  കൊണ്ട് അവൾ വാങ്ങിയില്ലേന്നുമായിരുന്നു അവൾ പറഞ്ഞത്. ആ മദ്യപാനിയായ അസാന്മാർഗിയായ ചെറുപ്പക്കാരന് തക്ക ശിക്ഷ കിട്ടണമെന്നു അവർ പറഞ്ഞു തീരും മുൻപ് മുറിയില കയറി വരുന്ന എറിക് താനാണ് ആ പ്രതി എന്ന് ഏറ്റു പറയുന്നു 

ഉപ്പുതിന്നാൽ വെള്ളം കുടിക്കുമെന്നും പാവപ്പെട്ടവരെ ഇങ്ങനെ ദ്രോഹിച്ചാൽ ചോരയും അഗ്നിയും കൊണ്ട് അവരും ദ്രോഹിക്കപ്പെടുമെന്നു പറഞ്ഞ് ഗൂൾ മടങ്ങുന്നു. ഇടതുപക്ഷ ചിന്തയും മതവിശ്വാസവും ഇഴചേർ ത്താണ് അയാള് സംസാരിക്കുന്നത് 

പുറത്തേയ്ക്ക് പോയ ജറാൾഡാകട്ടെ ഗൂൾ എന്നൊരു ഇൻസ്പെക്ടർ പോലീസിൽ ഇല്ല എന്ന വാർത്തയുമായാണ് മടങ്ങി വരുന്നത്. പോലീസ് കള്ളനായത് കൊണ്ട് തങ്ങൾ ചെയ്ത് കുറ്റം തങ്ങൾ തന്നെ സമ്മതിച്ചെങ്കിലും അതൊന്നും സാരമില്ല എന്നതാണ് ഷീലയും എറിക്കും ഒഴികെ എല്ലാവരുടെയും നിലപ്പാട്. തെറ്റ് തെറ്റ് തന്നെയാണെന്ന ഇളം തലമുറയുടെ വാദത്തെ അവർ തള്ളുന്നു.

മോർച്ചറിയിൽ അങ്ങനെയൊരു ശവമില്ല എന്ന് ഫോണിൽ വിവരം ലഭിക്കുന്നതോടെ അവർ ആകെ സന്തോഷത്തിലാണ്, ഷീലയും എറിക്കും ഒഴികെ. പെട്ടെന്ന് ഈവ എന്ന ഒരു പെണ്‍കുട്ടി ആത്മ ഹത്യ ചെയ്തെന്നും ഒരു ഇൻസ്പെക്ടർ അതന്വേഷിക്കാനായി ആ വീട്ടിലേയ്ക്ക് വരുന്നെന്നും കേട്ടു അവർ ഞെട്ടിത്തരിച്ചു നിൽക്കുമ്പോൾ നാടകം അവസാനിക്കുന്നു.

ഷീലയുടെയും എറിക്കിന്റെയും ഗൂളിന്റെയും സംഭാഷണം വളരെ ശ്രദ്ധേയമാണ്  

ശേഷക്രിയ

അതിനെക്കുറിച്ചു തന്നെയാണ് പറയുവാനുള്ളത് 

കേട്ടവർ കേട്ടവർ മൂക്കത്ത് വിരൽ വെച്ചു 

കേൾക്കാത്തവർ കാതുകൂർപ്പിച്ചു 

ഒന്നും പിടികിട്ടാത്തവർ ഇരുട്ടിൽ തപ്പി 

ശേഷിച്ചവർ മനസിലായെന്നു നടിച്ചു 

ശരിക്കും എനിക്കും അത് വിശ്വസിക്കാനായില്ല 

പത്രങ്ങളിൽ വളഞ്ഞു പുളഞ്ഞ ഇരുളായും 

ടി വിയിൽ  വ്യാകരണം ഇല്ലാത്ത ചിത്രങ്ങളായും 

എഫ് എമ്മിൽ സല്ലാപമായും 

അതൊന്നും വന്നിരുന്നില്ല 

കാമിനിയുടെ പരിഭവത്തിലും 

സുഹൃത്തിന്റെ വിരഹത്തിലും 

വറ്റിയ തടാകത്തിലും 

ഇല പൊഴിഞ്ഞ മരത്തിലും 

വരണ്ട ഭൂമിയിലും 

ഞാൻ തൊട്ടറിഞ്ഞതാണ് 

നിങ്ങൾ ഭാഗ്യവാന്മാരാണ് 

നിങ്ങൾക്കത് വിശ്വസിക്കാതെയിരിക്കാം 

പക്ഷെ ഞാനെന്റെ ഉറ്റ ബന്ധുവായതു കൊണ്ട് 

എനിക്കീ ശേഷക്രിയയിൽ 

പങ്കെടുത്തേ തീരൂ  

ഉച്ചയുറക്കം

പടിവാതിൽ ചാരാതെ 

പതുപതുത്ത ഇരുട്ടുകൊണ്ട് 

മൂടിപ്പുതയ്ക്കാതെ 

ഭയത്തിന്റെ കയ്യിൽ നിന്നും 

അടഞ്ഞ കണ്ണിനെ തട്ടിയെടുത്ത് 

ആഗ്രഹങ്ങളുടെ മാറാപ്പിലൊളിപ്പിച്ച് 

മരണാനന്തരത്തിന്റെ ബലിച്ചോറുണ്ണാൻ 

പകൽവെളിച്ചം തുരന്നൊരുക്കിയ 

ഉച്ചമയക്കത്തിന്റെ ഗുഹയിലേയ്ക്ക് 

നാലുപേർ ചുമന്നെന്നെ 

കൊണ്ടുപോകുന്നതും കാത്ത് 

ഓർമകളുടെ കാട്ടുവള്ളികൾ 

വകഞ്ഞുമാറ്റി 

കീറിമുറിക്കപ്പെടുന്ന ശവത്തിന്റെ 

കേൾകാത്ത ഞരങ്ങൽ 

ഒരു ദീർഘനിശ്വാസത്തിലൊതുക്കി 

ക്ഷമനശിക്കുന്നൊരീ 

ഉഷ്ണകാലമദ്ധ്യാഹ്നം 

പ്രഭാത സവാരി

 സൂര്യനു  മുൻപേ ഉണർന്ന് 

മഞ്ഞുകൊണ്ടു പൊട്ടിയ 

ചരൽക്കല്ലിന്റെ ഈർഷ്യ                             
പാദം കൊണ്ട്‌ തൊട്ടറിഞ്ഞ്                          
ഒഴിഞ്ഞ വീഥിയിലൂടെ                                 
ഒഴിയാത്ത ചിന്തകൾ ചുമന്ന്                         
വെട്ടം സൂക്ഷിച്ചു സൂക്ഷിച്ചു ചിലവാക്കി           

മടിച്ച് മടിച്ച്  ഒരു നടത്തം                             

എന്നോടൊപ്പം ഒറ്റയ്ക്ക് നടക്കുന്നവർ 

കൂടെയെത്തി എന്നെയും കടന്നു പോകുന്നവർ   
എന്റെ നേരെ നടന്നു ഞാനായിത്തീരുന്നവർ 

കോടമഞ്ഞിൽ ആർത്തിയോടെ അലിയുന്നവർ 

എനിക്കറിയേണ്ടത് ഞാനിനിയും എന്നെക്കടന്ന് പോയില്ലേയെന്നാണ്‌   നിങ്ങൾക്കറിയേണ്ടത് അതിന്റെ കാരണവും 

വീണു കിട്ടിയത്

അത്യാവശ്യമായി ഒരു കവിത വേണം പത്രാധിപർ പറഞ്ഞു 

അതും ജാനകിയുടെ കൂടെ ചേർന്ന് എഴുതണം 

വേണമെങ്കിൽ ജാനകിയെ പ്രേമിക്കാം, വിവാഹം കഴിക്കാം 

കുഞ്ഞുങ്ങളെ ജനിപ്പിക്കാം 

പക്ഷെ കൂടെച്ചേർന്ന് കവിത എഴുതുക എന്നൊക്കെ പറഞ്ഞാൽ 

കാമവും കലിയും പെട്ടെന്ന് വരും 

അത് പോലാണോ കവിത 

പക്ഷേ പത്രാധിപരാണ് ആജ്ഞാപിച്ചത് 

ശമ്പളം അങ്ങേർ തന്നാലേ ഉള്ളൂ 

കെട്ടുകാഴ്ചയേക്കുറിച്ച് ഒരു കവിത

കേകവൃത്തത്തിൽ, നല്ല ദീർഘചതുരത്തിൽ 

കൊട്ടും കുരവയുമായി തുടങ്ങാം, അതെന്തായാലും ഉണ്ടാവുമല്ലോ 

"പക്ഷെ വേഗം വേണം. ഉത്സവം കഴിയുന്നത്‌ വരെയൊന്നും 

കാത്തുനില്കാൻ നേരമില്ല. എല്ലാം നടന്നെന്നു തന്നെ എഴുതിക്കോ 

അതേ ഇപ്പൊ നടക്കൂ."

ഒരു വാക്ക്, രണ്ടു വാക്ക്, മൂന്നാമത്തെ വാക്ക് ജാനകി ഊഹിച്ചു 

അതോടെ പേപ്പർ ചുരുട്ടി ഞാൻ ദൂരെ എറിഞ്ഞു 

പിന്നെ പേന കൊണ്ടും, നാക്ക് കൊണ്ടും, ചുണ്ട് കൊണ്ടും 

നഖം കൊണ്ടും പല്ല് കൊണ്ടും  പിന്നെ കൊള്ളുന്നതും 

കൊള്ളാത്തമായ എല്ലാം കൊണ്ടും 

അവളുടെ ദേഹത്താകെ വരഞ്ഞു, 

ഞാൻ മയക്കത്തിൽ നിന്നുണർന്നപ്പോൽ 

ജാനകി, അല്ല കവിത, ചോദിച്ചു, "കഴിഞ്ഞോ?"

പിന്നെ അവളുടെ നെഞ്ചിൽ എന്റെ കയ്യൊപ്പ് ചാർത്തി 

ഒരു സ്കൂൾ കുട്ടിയേപ്പോലെ 

ഞാനാക്കവിത കാണാതെ പഠിച്ചു 

അർഥം വിവരിച്ച് സ്വാരസ്യം വ്യക്തമാക്കുന്നതൊക്കെ 

അടുത്ത ജന്മത്തിലാകാം 

എന്റെ മരണം

മൂന്നാംദിവസത്തിനൊന്നും 

കാത്തുനിന്നില്ല 

മരിച്ചയുടൻ ധൃതിയായിരുന്നു 

ജനിക്കാൻ 

പഞ്ചഭൂതങ്ങളായി 

പങ്കുവെയ്ക്കപ്പെട്ട ശരീരം 

പങ്കിനെക്കുറിച്ചും  

പങ്കുവെയ്ക്കലിനെക്കുറിച്ചും 

പങ്കത്തെക്കുറിച്ചും 

പങ്കജത്തെക്കു റിച്ചും 

പങ്കജാക്ഷനെക്കുറിച്ചും 

പങ്കായത്തെക്കുറിച്ചും 

അമരത്തെക്കുറിച്ചും 

അമരരെയും അമർത്യരെയും 

കുറിച്ചൊക്കെ ഓർമ്മിപ്പിച്ചു

ആരുടെയെങ്കിലും 

(അതിനി കാലന്റെയാണെങ്കിലും)

കാലുപിടിച്ച് 

പണയം വെച്ചതൊക്കെ 

തിരിച്ചെടുക്കണം 

കനകവും കാമിനിയും തുടങ്ങി 

കലഹ കാരണങ്ങളൊന്നും അല്ല 

മുക്കുപണ്ടങ്ങളുമല്ല മുഖ്യ പണ്ടങ്ങൾ 

ജീവിതം, സ്വാതന്ത്ര്യം 

സന്തോഷം, സമാധാനം 

എന്നിട്ടേ ഞാനിനി 

പുറത്തേയ്ക്കുള്ളൂ 

എന്റെ ലോകം

തുണിയുരിഞ്ഞ നർത്തകി

എന്റെ തൊലിയുമുരിഞ്ഞു 

ഉന്നം തെറ്റിച്ച് അമ്പെയ്ത ശിഷ്യൻ 

എന്റെ തല കൊയ്തു 

ആരെയും ആരുമറിയാത്ത മദ്യശാലയിൽ 

എന്നെ എല്ലാരും തിരിച്ചറിഞ്ഞു 

എനിക്കിനി അഭിനയിക്കാൻ 

കാണികളുടെ ഭാഗം മാത്രം ബാക്കി 

കാട്ടുവള്ളി പിടിവള്ളി 

കയ്യിലിരുന്ന് ഞെരുങ്ങി മുറിഞ്ഞു 

ഈ കണ്ണാടിയെല്ലാം 

ഞാൻ തന്നെ ഉടച്ചതാണ് 

മുഖം മിനുക്കാനുള്ള ബദ്ധപ്പാടിൽ 

എന്റെ ലോകവുമങ്ങിനെ 

ഒരായിരം കഷണങ്ങളായി 

അഗ്നിശുദ്ധി

വിധി പറഞ്ഞു ന്യായാധിപൻ, നിങ്ങൾക്ക-

ങ്ങധികനാളില്ല തൂക്കിലേറീടുവാൻ 

അവരിലഞ്ചാമനേറ്റവും ക്രൂരനാ-
ണവനു ശിക്ഷയേ കിട്ടിയില്ലൊട്ടുമേ 

അരുമ ബാലികതൻ ജീവരക്തമേറ്റി  

രിരുളു പോലെ കറുത്തൊരു വസ്തുഞാൻ 

തെളിവിനായ് വന്ന വസ്തുക്കളോടോപ്പ-

മരുളി മൌനമായ് ഞാനുമാസംഭവം   

ശ്യാമധൂളിയായ് മണ്ണിൽ പിറന്നു ഞാൻ 

ഹോമകുണ്ഡത്തിൽ നീറിയമർന്നു ഞാൻ 

ചൂടു തീരെ സഹിക്കുവാനാകാതെ 

കൂടി ധൂളികൾ ഞങ്ങളൊന്നായിപോൽ   

പിന്നെ രാസപ്രയോഗങ്ങളഗ്നിയു-

മൊന്നു ചേർന്നു ഖരവസ്തുവായ് മാറി

ഒടുവിലായുധത്തല്ലാൽ തലോടലാൽ 

നെടിയ നീണ്ടൊരു കമ്പിയായ് മാറി ഞാൻ 

ബുദ്ധിയുള്ളോരു മർത്യൻ സഹായിച്ചു 

സിദ്ധമായെനിക്കങ്ങൊരു കർമ്മവും 

പതിവ് തെറ്റാതെയോടുമീ ബസ്സിന്റെ 

ഗതി നിയന്ത്രിക്കുമായുധമായി ഞാൻ 

പാതിരാവിലീ കാപാലികർ വന്നു 

പാതിമാത്രം വിരിഞ്ഞൊരാ  മൊട്ടിനെ 

കൈവിരലാൽ കശക്കിയെറിയവേ 

ഭൂവിൽ ഞാൻ മാത്രമതിനന്നു സാക്ഷിയായ് 

മരണവേദനയേറ്റു പിടയുന്ന 

തരളമേനിയിൽ ക്രൂരമാം കൈകളാൽ 

എന്നെയാഴത്തിലാഴ്ത്തിയിറക്കിയോർ 

കൊന്നു പാവമാതിങ്കൾകിടാവിനെ 

ക്രൂരമാം രംഗമീ വിധം ഭീകരം 

ഉരുകുവാനും കഴിഞ്ഞില്ലയെങ്കിലും 

കാരിരുമ്പിന്റെയുള്ളിൽ തിളങ്ങുന്ന 

സൂര്യതേജസാം സത്യമറിഞ്ഞു ഞാൻ 

വിധി, വിചാരണയെല്ലാം കഴിഞ്ഞു പോയ് 

അധികമാളുകളൊന്നുമോർക്കാതെയായ് 

ആർക്കു വേണമീ പിഞ്ചിയ വസ്ത്രവു

മൊരുസ്റ്റെതസ്കോപ്പ് കമ്പിയും ഗാവലും*

വഴിയിൽ വീണു കിടന്നൊരു ഞങ്ങളെ 

കുഴികുഴിച്ചങ്ങു മൂടുവാനാകാതെ 

ലോറിയിലേറ്റിയെങ്ങോ കടത്തുന്നു 

അറിയുകില്ലെന്റെ ശേഷിച്ച നാളുകൾ 

കാരിരുമ്പെന്നെയഗ്നിക്കു നൽകിയാൽ 

ഉരുകിടും പിന്നെ മാറ്റിടാം രൂപവും 

അഗ്നിയിൽ വീണു ശുദ്ധമായീടവേ 

ഭഗ്നമെന്റെയുമുള്ളിലീ പ്രാർത്ഥന 

ഇനിയുമുണ്ടൊരു ജന്മമെനിക്കെങ്കിൽ 

കനിവിയന്നെന്റെ ആഗ്രഹം കേൾക്കണം 

ഉരുകി ഞാനതെൻ  തെറ്റിന്നു ശിക്ഷയായ് 

കരുതി മാപ്പെനിക്കേകണേ ദൈവമേ 

ഉരുകിയഗ്നിയിൽ ശുദ്ധമായെങ്കിലീ 

കാരിരുമ്പിനെ ഖഡ്ഗമാക്കീടണം 

ഉടലുനല്കിയും പെണ്ണിനെ കാക്കുന്ന 

ഭടനൊരുവന്റെയായുധമാക്കണം 

ചങ്ങാതിയും കണ്ണാടിയും

 

 കണ്ണാടി കാട്ടിടാമെന്നു ചൊല്ലി 

ചങ്ങാതിമാരെന്റെ കൂടെയെത്തി 

കണ്ണാടിയിൽ കണ്ടൊരെന്റെ രൂപം 

ചങ്ങാതിമാർക്കുമങ്ങിഷ്ടമായി 

കണ്ണാടി ചങ്ങാതിയായി മാറി 

കണ്ണെനിക്കെന്തിനീ കൂട്ടുപോരെ

കണ്ണിലെ കൃഷ്ണമണിക്കു  തുല്യം 

എണ്ണി ഞാനെന്നാത്മബന്ധുക്കളെ 

പിന്നെയൊരിക്കൽ തിരിച്ചറിഞ്ഞു 

എന്നെ ഞാനൊട്ടുമറിയുകില്ല 

അന്യമായെന്നുടെ കണ്ണുരണ്ടും 

ഛിന്നമായ്പ്പോയെന്റെ സ്വത്വമെല്ലാം 

ഇന്നുവരെ ഞാനീക്കണ്ടതെല്ലാം 

എന്നെക്കുറിച്ചുള്ള ചിന്തമാത്രം 

എന്നെ സ്തുതിക്കുന്ന ചങ്ങാതിമാർ 

എന്നിലെ കുറ്റങ്ങൾ കാണാത്തവർ 

ഒന്നു ചിന്തിച്ചാലിതെന്റെ കുറ്റം 

എന്നും മുഖസ്തുതിക്കാരെ മാത്രം 

ചങ്ങാതിമാരായ്ക്കരുതി ഞാനും 

പൊങ്ങും അഹങ്കാരമെത്ര മൂഢം

പിന്നെത്തിരഞ്ഞു ഞാൻ കണ്ടുമുട്ടി 

എന്നെത്തിരിച്ചറിഞ്ഞോർ ചിലരെ 

അന്യനെപ്പോലെതന്നാണു നമ്മൾ 

എന്നു  ചിന്തിക്കുന്ന ബുദ്ധിമാന്മാർ 

ഇല്ലിനി വേണ്ടൊരു കണ്ണാടിയും 

ചൊല്ലിടേണ്ടൊട്ടും മുഖസ്തുതിയും 

എന്റെ മുഖം തന്നെ കാണ്മു ഞാനും

നിന്റെ മുഖംമൂടി മാറ്റിടുമ്പോൾ 

നിന്നിലും ഭേദമല്ലെന്റെ സ്വത്വം 

ഒന്നാണു നമ്മൾ മനുഷ്യരെല്ലാം 

ഒന്നുമില്ലാർക്കും പ്രശംസിക്കുവാൻ 

മന്നിടത്തിൽ സത്യമിത്രമാത്രം 

തല്ലിയുടയ്ക്കുകീ കണ്ണാടികൾ 

ഇല്ലതിലൊന്നുമേ സത്യമൊട്ടും 

ചങ്ങാതികൾ നിങ്ങളെല്ലാവരും 

കണ്ണാടി പോലെ തിളങ്ങിടുന്നു