ചായ

******
വെളുത്ത മൺപാത്രവും ഉടുത്ത്
ആവി പറക്കുന്ന കൈകളുയർത്തി
മാടി വിളിച്ച്
ചുംബനങ്ങൾക്കായി തപസ്സ് ചെയ്ത്
തിളച്ചു മറിഞ്ഞിരുന്ന യൗവ്വനത്തിന്റെ
ഓർമ്മയും ചൂടും ചൂരും ചൂടി
ഞാനുണരുന്നതും കാത്ത്
എന്റെ മേശപ്പുറത്ത്
ആയിരമായിരം ജന്മങ്ങൾ താണ്ടി
എന്നോട് ചേർന്ന് ഞാനായി മാറാൻ
നാവിലെ കയ്പ്പും
ഓർമ്മയിലെ ഉണർവുമായി 
ദ്രാവകരൂപത്തിൽ
ലാസ്യത്തിന്റെ
വഴക്കവും വഴങ്ങലുമൊതുക്കി
മൂല്യനിർണ്ണയത്തിനും
അംഗീകാരത്തിനുമായി
ഒരു ഊഷ്മളവസ്തു