അയല വറുത്തതുണ്ട് കരിമീൻ പൊരിച്ചതുണ്ട് 

കുടംപുളിയിട്ടുവെച്ച നല്ല ചെമീൻ കറിയുണ്ട് (എന്നപോലെ പാടാം)

പക്ഷേ തിന്നാനല്ല ക്ഷണം

ഒരു പ്രണയാഭ്യർത്ഥന

******************************

കാണാത്ത കാഴ്ചേമില്ലാ കേൾക്കാത്ത കാര്യോമില്ല

തിന്നാത്ത തീറ്റേമില്ലാ മോന്താത്ത വെള്ളോമില്ല

ഉണ്ടാലുമുണ്ടില്ലേലും ചത്താലുമത്രേം കാര്യം

എല്ലാമെന്നുള്ളിൽ കേറും പാട്ടായിത്തീരേം ചെയ്യും

വേണ്ടാത്തതെല്ലാം തന്നാൽ വേണ്ടുന്നതെന്തും പാടാം

ചോദിച്ചാലെന്തും ചൊല്ലാം പാടേണമെന്നോടൊപ്പം

നിന്റേതാണെൻറെതെല്ലാം നീയുമങ്ങെന്റേതായാൽ

ഒന്നായിട്ടൊന്നിച്ചൊപ്പം നന്നായിട്ടെല്ലാം ചെയ്യാം

പണ്ടത്തെപ്പാട്ടും പാടി പാടത്തെ വെള്ളോം തേകി

വേലയ്ക്കു പൊകാമൊന്നായ് കൂലിയും വാങ്ങാമൊന്നായ്

കാന്താരീം മോരും ചേർത്ത് തോട്ടിലെ മീനും കൂട്ടി

കാലത്തീ പഴംചോറ് ഉച്ചയ്‌ക്കോ കപ്പേം ചക്കേം

വേലയും കാണാമൊന്നായ് കൂത്തിനും കൂടാമൊപ്പം

തേവരെ കാണാൻ പോയാൽ കൂട്ടരേം കാണാമല്ലോ

പോരുമ്പോഴങ്ങാടീന്ന് മേടിക്കാം തിന്നാന്തീറ്റി

വൈകാതെ വീട്ടിൽ ചെല്ലാം വയ്‌ക്കേണ്ടിന്നത്താഴവും

പാഠങ്ങൾ ചൊല്ലിച്ചൊല്ലി കുട്ടികൾ തൂക്കം തൂങ്ങി

അത്താഴമുണ്ണാമിപ്പോഴെല്ലാർക്കുമൊപ്പം കൂടാം

അപ്രത്തെയമ്മൂമ്മയ്ക്കും പൂച്ചയ്ക്കും തത്തമ്മയ്ക്കും

കൊണ്ടുപോയ് കൊടുക്കേണം എന്നിട്ടേ ഉണ്ണാവുള്ളൂ